CEBU, Philippines - Presyo sa commercial o premium rice naapektahan tungod sa pagsaka sa presyo sa produktong petrolyo matud pa sa National Food Authority-7.
Si Lucy Rosales, public information officer sa National Food Authority (NFA) 7 nga nahinabi sa Banat News kagahapon mitataw nga P1 ngadto sa P2 kada kilo sa premium rice sama sa Ganador, Sinandoming ug uban pa ang pagsaka niini.
Apan gipasalig hinuon niyang ang NFA rice nga imported gikan sa Vietnam magpabilin gihapon sa P27 ang kada kilo.
Bisan og off-harvest na karong mga bulana nagpadayon ang pag-monitor sa NFA sa supply sa bugas dinhi sa rehiyon ug ilang gipaniguro nga dunay paigong suplay niini karong nagsugod na ang panahon sa tinguwan.
Gipahibalo ni Rosales nga bag-ohay pa lang naka-diskarga og 54,000 metriko tonelada nga bugas (440,000 ka sako) gikan sa nasud sa Vietnam, 180,000 ka sako niini adto dad-on sa Rehiyon 8.
Dugang pa niya nga karong 2013 dunay walo ka barko nga nagkarga og Vietnam rice ang moabot, lima niini nahuman na og hatud sa mga bugas samtang gipaabot pa ang tulo.
Ang Pilipinas miyembro sa World Trade Organization (WTO) nga diin nalakip sa kasabotan mao ang pagsigurong walay miyembrong nasud ang mahutdan og suplay sa bugas. (BANAT NEWS)