CEBU, Philippines - Gipahalipayan sa mga sakop sa Cebu City Council ang walo nila ka kauban kang kansang termino mapupos na karong Hunyo 30 ug katapusan na lang nga pagtambong nila sa sesyon kagahapon.
Sukwahi sa nahitabo sa Kapitolyo nga wala makapahigayon og sesyon ang mga sakop sa Provincial Board tungod kay wala na manungha ang kadaghanan sa mga Board Members, sa City Hall diha g’yud ang mga “outgoing†nga konsehal.
Ang konseho nagkauyon nga pasidunggan ang walo nila ka kauban nga nakatampo og daku sa paghimo sa mga ordinansa nga alang sa kalamboan sa dakbayan.
Ang gipasidunggan mao sila si Vice Mayor Joy Augustus Young, Konsehal Edgardo Labella, Raul Alcoseba, Rodrigo Abellanosa, Eduardo Rama, Ronald Cuenco, Jose Daluz III ug Augustus Pe Jr.
Matud ni Konsehal Margarita “Margot†Osmeña ug Alvin Dizon nga angayan lang nga yukboan ang mao nga mga sakop sa konseho nga nakaserbisyo og taud-taud nga panahon sa dakbayan.
Sagad kanila wala na makadagan kay napupos na ang tulo nila ka termino nga gitugot sa balaud, gawas lang ni Konsehal Cuenco nga may higayon pa unta nga makapapili pag-usab apan wala na modagan sa miaging eleksyon.
Si Labella mao na ang mobanus paglingkod isip presiding officer sa konseho human siya napili nga bise mayor, samtang si Abellanosa molingkod usab pagka-kongresista sa south district.
Si Alcoseba adto na usab molingkod sa Cebu Provincial Board isip bokal. (BANAT NEWS)