Lolo naligsan sa V-hire patay

CEBU, Philippines - Patay diha-diha ang   usa  ka  lolo human kini maligsi og V-hire sa iyang paglabang sa karsada didto sa highway sa barangay Laaw lungsod sa Borbon niadtong Domingo sa alas 7:25 sa gabii.

Ang biktima giila nga si Maximo Badinas, 59, minyo, construction worker ug molupyo sa nahisgutang lugar.

Samtang ang drayber sa V-hire  nga nakaligis sa biktima mao si Joven Jomao-as Dimpas, 25, ulitawo, nga  nagpuyo  usab  sa  lungsod sa Daanbantayan.

Si PO1 Harold Catulpos sa Borbon Police  Station mibutyag  sa Banat News  nga  ang V-hire nagkarga  og mga pasahero  paingon sa lungsod sa Daanbantayan.

Apan pag-abot sa maong lugar mikalit og labang ang biktima ug dihang nakamatikod  sa nagdung nga sakyanan, mihana kini  og atras apan milahos  gyud  sa paglabang.

Didto naglisud  na sa  pagpreno  ang drayber  sa V-hire ug naligsan gyud ang biktima. Ang  pagkalamba  niini  sa sementadong  karsada maoy  nakaingon  sa hinanali  niyang  kamatayon.

Dali  nga gitabang  sa  mga tawo nga diha sa palibot ug  gihatud  ngadto  sa hospital  bisan wala  na  kini  panimuot.

Samtang ang drayber sa V-hire dihang nakakita sa Rough Rider bus   nga  paingon sa siyudad sa Bogo gipara kini ug misakay dayun gibiyaan  ang  iyang  sakyanan  nga  may  mga  pasahero  ug didto na motahan sa iyang kaugalingon sa kapolisan sa Bogo City.

Ang biktima gideklarar kining Dead on Arrival (DOA) paghiabot sa Juan Dosado Memorial Medical Center sa barangay Damolog, lungsod sa Sogod.

Samtang ang drayber sa V-hire gikuha kagahapon sa kapolisan sa Sogod didto sa Bogo City ug nabalhug na karon sa karsel samtang gihikay ang kasong ipasaka batok niya. (/WC)