Listahan kinsay ma-renew sa Cebu City Hall casual employees ipagawas karong semanaha

CEBU, Philippines - Mahibaw-an na karong semanaha kung kinsa sa mga casual employees sa Cebu city hall ang mopadayon sa serbisyo o dili. Gibutyag ni Human Resource Development Office (HRDO) assistant department head Sonny Gimenea nga duha ka klaseng kontrata ang ilang ihatag niadtong ma-renew—unom ka bulan ug tulo ka bulan.

Ang tulo ka bulan alang niadtong mga dili unta i-renew apan gihatagan og higayon sa mayor aron ipakita ang ilang katakos nga mopadayon pagsilbi sa dakbayan.

Ang giumol sa mayor nga evaluation committee mao ang naghimo sa listahan base sa rekomendasyon sa matag department heads nga nanukad sa performance sa empleyado ingon man sa iyang loyalty ngadto sa subling napili nga Mayor Michael Rama.

Ang lista ipaskil sa matag opisina kundili Miyerkules o Huwebes ning semanaha.

Si Gimenea mibutyag nga kasagaran sa mga dili ma-renew kadtong naa sa utility ug clerical nga posisyon. Ang city hall dunay 3,308 ka co-terminus employee sa lain-laing opisina sa dakbayan. (BANAT NEWS)