Paglaksi sa mga billboard gihangop

CEBU, Philippines - Gihangop ni Umapad Barangay Kapitan Nelson Rubio ang lakang nga gihimo sa konseho sa dakbayan sa Mandaue nga nag-awhag sa pagpatangtang sa mga commercial billboard nga anaa  sa mga skywalk sa dakbayan   lakip na ang  anaa  sa dalan United Nation Avenue dapit  sa Marcelo Fernan Bridge.

Ang lakang sa konseho sa maong dakbayan nahimo  pinaagi  ni  Konsehal Jimmy Lumapas nga maoy nagpalabang sa resolusyon   kalabot  niini.

Sa maong resolusyon    iyang giawhag si Department of Public Works and Highways (DPWH) 7  Regional Director Pedro Herrera Jr.   nga  maimbistigar  ang  mga  hingtungdang opisyal  sa dakbayan  nga  mitugot sa  pagtaud sa mga commercial billboard sa skywalk ug sa pagtangtang gilayon niini.

Si  Konsehal Lumapas nga maoy chairman  sa committee on public works and infrastructure sa konseho  miingon nga  kining  maong  mga  billboard nag-advertise sa produkto  nga walay  permit sa buhatan sa Office of Building Officials  (OBO) sa        dakbayan.

Sa nasayran, gireklamo ni Kapitan Rubio ang gipangtaud nga mga billboard sa skywalk sa ilang dapit tungod kay mahadlok na man ang mga tawo moagi ilabi na sa gabii kay nasalipdan  ug dili na makita ang tawo nga moagi ug kuyaw na hinuon nga mabiktima sa dautang elemento.

Gitataw ni Kapitan Rubio nga nahimong risgo na  alang sa mga tawo nga maligsan og sakyanan iniglabang  sa ngitngit  nga  bahin  sa karsada. (BANAT NEWS)