CEBU, Philippines - Ang uyab sa Canadian National nga napalgang patay sulod sa Pension house sa Poblacion, lungsod sa Barili sa miaging buntag giapil sa imbestigasyon sa pagtino kun wala bay foul play ang kamatayon niini.
Si PO2 Jessielloyd Sebial sa Barili Police Station mibutyag sa Banat News nga si Viane Panares, hingkod, dalaga, ug nagpuyo sa barangay Mantalongon, Barili maoy giingong uyab sa biktima.
Hinuon atol sa interogasyon nanghunaw si Panares ug igo lang miingon nga samtang mi-check–in sa Shamrock Pension House ang langyaw, siya mipauli usab sa ilang balay sa Mantalongon.
Hangtud kagahapon matud ni PO2 Sebial wala pa ma-autopsy ang patay’ng lawas ni Richard Glen White, 44, nga taga Holland,Canada tungod kay gipaabot pa sa kapolisan ang pagtugot sa mga kabanay niini. Hinuon giklaro sa kapolisan nga wala isipa nila nga suspek sa maong kamatayon ang iyang uyab nga taga Mantalongon.
Matud nila nga igo lang kining gisukit-sukit aron kakuhaan og dugang detalyi ang maong langyaw bahin sa tinuod nga nahitabo. Dugang nahipos sa kapolisan gikan sa kawani sa maong Pension house nga si Belgin Camus, nga maoy mipahibawo sa kapolisan nga sa miagi pang adlaw mi-check in ang maong langyaw nga nag-inusara ug nanugon daan kini nga mopahuway siya ug dili magpa -disturbo ni bisan kinsa.
Ang maong langyaw gihulagway nga mao pay unang higayon sa pag-adto sa maong dapit aron magkakita sa iyang uyab. Padayon pa hinoon karon ang imbestigasyon pagtino kun aksidente o aduna bay foul play ang maong kamatayon niini. (BANAT NEWS)