40 ka vendors giisyuha’g tiket tungod sa pagpataka og labay’g basura

CEBU, Philippines - Mokabat na sa 40 ka mga manindahay sa merkado publiko sa dakbayan sa Mandaue ang nakadawat og citation tickets ug nakabayad og multa nga nagkantidad og P500 ang matag usa kanila isip silot kanila tungod sa higpit na nga pagpatuman sa kalimpyo sa merkado.

Si Mosuline Suliva, market administrator sa Mandaue City miingon nga himuon na nilang kada buwan ang pagpanglimpyo sa kanal sa merkado aron malikayan ang paglunop sa baha panahon sa ting-uwan.

“This is to show that cleanliness of the public market is everybody’s concern,” ni Konsehal Lumapas pa sa iyang pamahayag ngadto sa mga tigbalita kinsa mitabang usab sa pagpanguha sa basura ug gisulod ngadto sa Material Recovery Facility sa nahisgutang merkado.

Ang pipila ka manindahay sa maong merkado nga nahinabi sa mga tigbalita hugtanon hinuon nga mihimakak nga ilang gituyo ang pagpataka og labay sa basura tungod lang sa ilang pagsupak sa kagamhanan sa pagbalhin kanila sa maong lugar.

Gitataw nila nga maayo na ang ilang kahimtang sa bag-ong merkado ug ang ilang mga customer naghinayhinay na man usab sa pagtultol kanila sa ilang pagpangumpra.  (BANAT NEWS)