CEBU, Philippines - Duha ka miyembro sa Crips gang ang gidakop human manulis sa usa ka call center agent ug nakuhaan usab og armas ug shabu diha sa Barangay Kinasang-an, Cebu City Huwebes sa gabii.
Gidakop ang mga suspetsado nga sila Rusty Cabigas ug Anecito Embrado Jr, human sila positibong giila sa ilang biktima nga si Israel Sato, 23, nga usa ka web developer sa Catapult International Corp.
Base sa imbestigasyon, ang team sa City Intelligence Branch pinangulohan ni Insp. Gomersendo Mandawe ang nagpahigayon og roving patrol sa Barangay Kinasang-an sa dihang usa ka bystander ang mipahibalo kanila pasado alas-9 sa gabii kalabot sa nahitabong pagpanulis sa unahan.
Ang maong estambay mitudlo sa duha ka suspetsado nga paspas nga naglakaw human tulisa si Sato hinungdan sa ilang pagkasikop.
Ang mga suspetsado, kinsa nisuway pa og sukol ang nakuhaan og usa ka-kalibre .357 revolver nga dunay lima ka buhing bala ug usa ka-kabhang sa kalibre .38; usa ka backpack nga dunay cellphone, mga ATM cards nga dunay pangalan ni Sato, ug usa ka pakete sa gituohang shabu.
Si Embrado ang nakuhaan usab og mga drug paraphernalia sama sa disposable lighter, tin foils, ug rinolyo nga mga papel.
Ang duha gidala sa Cebu City Police Office ug giila ni Sato nga maoy mitulis kaniya. Ang biktima ang nasamdan sa ulo human gibukbok sa armas sa dihang gitulis siya, suma pa sa hepe sa CIB nga si Chief Insp. Romeo Santander.
Ang CCPO director nga si Mariano Natu-el Jr. miingon nga miyembro sa Crips gang ug salin sa grupo ni Rene Baclaan alyas Insik kinsa naa na karon sa Cebu City Jail ang duha. Si Natu-el midugang nga si Cabigas ug Embrado ang nalambigit na sa pipila ka mga nahitabong pagpanulis ug sa nahitabong pagpamusil sa usa ka SK member sa Barangay Pardo miaging Domingo sa gabii.
Kasong ilegal nga paghupot og armas, drugas ug serious physical injury ang gipasaka batok sa duha ka suspetsado kagahapon.(/EIM) (BANAT NEWS)