CEBU, Philippines - Gawasnon na si Garry Wayne Kevol, ang Canadian national human kini mibutang P200,000 nga piyansa sa kasong kalapasan sa Republic Act 7610 o Child Abuse.
Ang kasong child abuse napasaka na sa korte human ni-waived si Kevol sa iyang katungod nga mapailawom sa preliminary investigation.
Si Kevol gipasanginlang nang-exploit og mga batang babaye aron iyang ika-sex.
Niadtong June 14, 2013, gidakop si Kevol sa mga sakop sa National Bureau of Investigation (NBI)-7 sud sa condominium diin siya temporaryong nagpuyo.
Niadtong higayuna duna siya’y kuyog nga 15-anyos nga babaye, kinsa mibutyag sa iyang affidavit nga bag-ohay lang gyud sila niadtong tungora nahuman og sex ni Kevol ug gibayran siya niini og P1,500.
Kahinumduman nga gi-reverse ni reviewing prosecutor Liceria Rabillas ang inquest resolution ni fiscal Mary Ann Castro.
Si Castro nagkanayon nga improper ang pagdakop sa langyaw human walay personal knowledge ang NBI agents nga nakahimo kini og krimen hinungdan nga iyang gimando nga pabuhian kini.
Apan human i-review ni Rabillas ang kaso, nagtuo siyang dunay personal knowledge ang NBI nga dunay gihimong krimen ang suspek tungod kay taas kaayo ang panahon nga gi-surveillance si Kevol sa NBI una pa kini gidakop.
Ang kabahin sa pag-aresto kang Kevol dili usab maisip nga wa masubay sa patakaran tungod kay nakita gyud nga nagkuyog ang bata ug si Kevol diha sa condominium base sa footage sa CCTV camera.
Before makagawas ang biktima sa premises sa condominium sakay sa iyang sedan gisita kini sa gwardya ug sa mga sakop sa NBI dayun pronounced arrest.
Sa laing bahin, gawasnon na usab ang duha ka babayeng sila si Giona Marie Geolina, 36, ug Maria Roselyn Olid, 40, kinsa gipasanginlang carnapping suspects human nakabutang tagsa-tagsa og P60,000 nga piyansa.(Mylen Manto/EIM) (BANAT NEWS)