Call center agent gitulis gipatay, laing usa tipi sad

CEBU, Philippines - Duha ka mga lalaki ang gipamusil patay sa managlahi nga lugar ug oras sa dakbayan sa Sugbo kagahapong adlawa.

Usa ka gituohang call center agent nga si Giovanni De Jesus, 30, molupyo sa barangay Mabolo ang gipusil patay sa gidudahang mga tulisan samtang kini naglakaw pauli gikan sa trabahoan.

Matud pa nga nakit-an ang biktima nga dunay gikalayog nga usa ka babaye nga giingong milabni sa iyang bag apan iyang gilayog hinungdan nga usa ka lalaki ang miduol ug gikalayog niya kini.

Wala dangti og minuto kalit nga mipaka ang usa ka buto sa armas ug nahagba ang biktima human maigo sa dughan.

Usa ka gwardiya sa atbang nga establisemento diin mahagba ang biktima mibutyag nga nabantayan niini ang biktima nga nagbaklay sa dalan gikan sa I.T park.

Adunay babayeng gikadungan niini sa paglakaw apan kalit gilabni sa maong babaye ang sling bag sa biktima hinungdan sa ilang panaglayog ug dihadiha miabot ang usa ka lalaki ug mitabang sa paglayog sa biktima.

Sunod nga nadunggan ang usa ka buto sa armas nahagba na si De Jesus ug daling nanakay sa usa ka motorsiklo ang mga tulisan ug mipasirit palayo sa lugar.

Ang imbestigador sa Homicide Section nga si SPO1 Victor Ruel Ayuman mipadayag usab nga posibleng tulis gyud ang nahitabo sa biktima apan tungod sa iyang pagsukol gipusil kini.

Sa laing insidente sa pagpamusil, alas-12 sa miaging tungang gabii usa ka lalaki ang gipusil patay samtang natulog sa ibabaw sa iyang  lamesa sa kapilya sa Villa Concepcion Kinasang-an Pardo sa siyudad sa Sugbu.

Maayong pagkabuslot sa ulo sa usa ka Abel Briones, 42, molupyo sa maong dapit ug giingong mangolektahay og basura sa maong lugar.

Walay nakakita sa pagpusil gawas lang sa buto sa armas nga nadungog sa usa ka  Antonio Ecojedo. Matud niini human nila madungog ang buto ilang gisusi diin kini gikan ug ilang naabtan ang biktima nga patay na.

Nakuha sa crime scene ang tulo ka kabhang ug tulo usab ka slug sa kalibre .45 nga gituohang gigamit sa pagpusil patay sa biktima. (Lesley Caminade-Vestil/EIM) (BANAT NEWS)