Police sa Oslob nagmaoy

CEBU, Philippines - Usa ka police nga team leader usab sa ilang grupo ang gireklamo sa iyang mga sakop nga kaubang mga bagitong polis tungod sa pagmaoy niini ug pagpanghulga kanila sulod sa Oslob Police Station.

Ang Provincial Investigation and Detective Management Branch (PIDMB) moimbestigar karon kang SPO1 Joel Miñoza tungod sa reklamo nila PO1 Rodel Monteza, PO2 Jerwin Arado ug PO2 Andy Gonez. Matud pa nga dili lang kini maoy unang higayon nga nagmaoy ang maong polis atol sa iyang duty. Ang reklamanteng si PO1 Monteza miingon kada duty sa maong polis nakainom gyud kini.Si Monteza mireklamong nasuko si Miñoza kaniya ug gipasanginlan siya niining iyang gi-padlock ang ilang barracks bisan wala niya kini siradohi. “Wala man to nako gi-lock ang pultahan…gisirado lang pero hubog na siya daan,” matud pang Monteza. Aron paglikay kay nakainom kini miadto sa presinto si Monteza apan giingong gisundan hinuon siya ni Miñoza nga nagdala na og fully-loaded nga M16 rifle. Giingong gikuha ni Miñoza ang maong armas sa ilang armory nga walay pananghid sa nagbantay niini.Naabtan pa sa assistant  team leader sa alert team nga si SPO1 Shane Montayre si Miñoza nga giingong nagpunay pa og hasi nila ni Monteza ug mga bagitong polis nga sila si Arado ug Gonez.Si Montayre na maoy mipakalma kang Miñoza.            

Una niini, gihimakak ni Miñoza ang pasangil apan miangkon kini kadugayan atol sa interogasyon.  Si Insp. Julius Ompad, PIDMB chief, miingon nga ang imbestigasyon gihimo alang sa pagpasaka og kasong administratiba kang Miñoza subay sa direktiba ni Cebu Provincial Police Office Director, Sr. Supt. Patrocinio Comendador.           

Si Ompad nagkanayon nga gibalhin karon ni Miñoza sa Provincial Public Safety Company alang sa seguridad niini samtang gipahigayon pa ang imbestigasyon ug samtang gipaabot pa ang kamandoan gikan sa Provincial Personnel and Human Resources and Development Branch (PPHRDB) kun asa siya idestino.  “For security na sa personnel sa Oslob basin manimalos pero depende sa admin kung asa siya ibalhin for the meantime PPSC man gyud na,” matud pang Ompad. Gikuha usab una ang kalibre .45 pistola nga giisyu kang Miñoza ug giuli kini diha sa CPPO. (BANAT NEWS)