CEBU, Philippines - Gisugyot ni Cebu City Fire Marshall William Tacaldo ngadto sa mga opisyal sa City Hall nga kinahanglang himoan na g’yud og access road ang mga dapit nga daghang nagpuyo apan dili makasulod ang mga trak sa bombero kun adunay sunog.
Si Tacaldo mihimo sa iyang sugyot atol sa tigum kagahapon sa mga sakop sa Police Coordinating Advisory Council (PCAC) kay problema gayud sa mga bombero ang gagmay nga karsada kay dili sila makasulod paingon sa mga hilit nga sitio.
Gipasabot ni Tacaldo nga tungod kay dili man makasulod ang mga firetrucks, ang mga bombero mapugos sa pagsumpay-sumpay sa mga hose aron makaabot ang tubig sa nasunogan nga nahimutang sa sudlonon nga bahin.
Apan matud ni Tacaldo nga tungod kay taas na man kaayo ang hose mohinay na ang gikusgon sa tubig nga ipasirit sa mga nasunog nga kabalayan.
Si Mayor Michael Rama nagkanayon nga gusto siya nga ilhon ni Tacaldo kun asa nga dapit dinhi sa dakbayan ang maayo nga unahon ang pagpahigayon og reblocking.
Daghang mga lugar dinhi sa dakbayan nga aduna nay mga access roads apan tungod sa kahakog sa ubang mga tawo nga anaa magpuyo daplin sa karsada, migamay ang agianan sa mga sakyanan.
Matud ni Tacaldo nga sila nga mga bombero abtik kaayo nga moresponde sa mga sunog apan adunay higayon nga ang binuhatan sa mga lumulopyo maoy magpugong kanila nga dili dayon sila makaabot sa nasunogan kay dili man makaagi dayon ang mga firetruck. (BANAT NEWS)