Magtiayong nasakpang nagdala og pinaugang dahon sa marijuana gikasohan

CEBU, Philippines - Kasong kalapasan sa  Dangerous Drug Act  ang  gipasaka   kagahapon ngadto  sa korte  batok  sa  magtiayon  nga nasakmitan og usa ka kilo nga pinaugang dahon sa marijuana sa  buy bust operation   sa kapolisan  nga  gihimo didto  sa parkingan sa Pacific  Mall sa  Ibabao Estancia, dakbayan sa Mandaue  sa miaging hapon.

Ang gipasakaan og kaso sa kapolisan mao sila si Randy Laureto, 37 ug asawa niini nga Catherine Laureto, 30 , nga lumad nga taga barangay Maslog sa dakbayan sa Danao.

Si SPO1 Edmundo Belocora sa kapolisan sa Presinto 4 sa Mandaue City Police Office (MCPO)  nga nahinabi sa Banat News miingon nga ang buy bust operation nga ilang gipahigayon,  gipangulohan ni  Inspector Ramil Morpos.

Ang  maong  grupo miabot  sa Pacific Mall human makadawat   og  kasayuran nga nagtug-an labot sa magtiayon nga maghatod og pinaugang dahon sa marijuana.

Sumala  sa informer ang  magtiayon magpaabot  sa   buyer sa gidala nga marijuana nga gisulod  lang  sa bag .

Dugang pa ni SPO1 Belocora nga ang ilang polis decoy maoy nangutana kun kinsa kanila si Randy Laureto .

Ang lalaki nga naglingkod sa waiting shade sa maong parkingan maoy miduol ug nagpaila nga mao ang gipangita niini.

Dali nga gikuha sa police decoy ang bag ug dihang  iya  kining  gisusi,  iyang  nasuta ang usa ka kilo nga pinaugang dahon sa marijuana   sa  sulod niini hinungdan nga dali niining gisakmit .

Ang magtiayon nga Laureto  giingon nga maoy supplier og pinaugang dahon og marijuana sa dakbayan  sa Mandaue ug sikbit pa nga kalungsoran sa lalalawigan  sa Sugbo. (WC) (BANAT NEWS)