CEBU, Philippines - Nahanaw ang mokabat sa P200,000 nga mga butang ug salaping dolyares gikan sa usa ka American national human lungkaba ang gipuy-ang apartment niini sa barangay Cogon, dakbayan sa Bogo sa miaging adlaw.
Ang biktima mao si Patrick Bryan Howell, 46, ug Maribel Broniola Howell, 22, nga Filipina niining asawa.
Si Maribel lumad nga taga isla sa Carnasa sa lungsod sa Daanbantayan, sa amihanang bahin sa lalawigan sa Sugbo.
Si SPO3 Oswaldo Layson sa kapolisan sa maong dakbayan nga nahinabi sa Banat News miingon nga ang mga biktima miasoy nga buntag pa sila nga nanglakaw.
Sa ilang pagpauli nianang pagkahapon ilang nadiskubrehan nga gilungkab na ang pultahan sa apartment nga ilang gipuy-an.
Sa ilang pagsulod sa ilang lawak nga ilang gipuy-an maoy ilang namatikdan nga nagkatuali na ang ilang mga sapot ug nahanaw na ang ilang i-pad nga P45,000 ang kantidad, duha ka laptop nga P60,000 ang kantidad sa matag usa niini.
Lakip nga nawagtang mao ang Chinese gold nga bracelet ug kuwentas nga P40,000 ang matag usa ug kapin sa $1,000 dolyares nga salapi.
Dugang pa ni SPO3 Layson nga ang mga nagpuyo sa kasikbit nga lawak sa maong apartment wala usab makamatikod sa maong pagpanglungkab.
Ilang gituohan nga ang mga kawatan nagpakaaron-ingnon lamang usab nga mga kustomer sa nahisgotang apartment ug hinungdan nga walay nakamatngon kanila. (BANAT NEWS)