CEBU, Philippines - Nagkahiusa ang buhatan sa Department of Public Works and Highways (DPWH) 7 ug ang kagamhanan sa dakbayan sa Mandaue sa pagsulbad sa suliran sa pagbaha sa kadalanan sa panahon nga mobunok ang ulan.
Si Engineer Julius Monsanto nga maoy chief on planning and design division sa DPWH 7 nga nahinabi sa mga tigbalita sa press conference nga gipahigayon miingon nga kasamtangan silang nakiglambigit sa mga lokal nga kagamhanan alang sa drainage improvement nga ilang ipatuman sa mga nasudnong kadalanan.
Dugang pa niya nga nag-una niini mao ang amihanan nga dalan nga manukad sa barangay Subangdaku paingon sa barangay Basak nga nalakip sa P65 milyones nga gahin alang sa pagpalambo sa kanal sa Cebu North Road to Hagnaya Wharf sa amihanang bahin sa lalawigan.
Gitataw niya nga ang maong gahin maoy tipik sa P150 milyones nga gahin sa nasudnong kagamhanan alang unta sa katukoran sa U.N. Avenue flyover nga wala mahinayon tungod kay ang maong kantidad dili man paigo alang sa maong proyekto.
Si Archetic Florentino Nimor Jr., nga maoy pangulo sa committee on drainage and planning sa kagamhanan sa maong dakbayan sa iyang pamahayag miingon nga lakip karon sa ilang himoon, uban sa DPWH 7 mao ang upat ka adlaw nga drainage evaluation sa dakbayan.
Matud pa niya nga sa pasiuna nga gihimo nilang pag-aninaw sa tibuok dakbayan sa panahon nga magbunok ang ulan ilang nasuta nga ang mga barangay nga magbaha mao ang Subangdaku, Mantuyong, Guizo, Tipolo, Basak ug Maguikay.
Nunot niini ilang nakita ang mga hinungdan nga ang maong mga dapit, nahimutang sa ubos nga bahin maoy mahan-ukan sa daghang tubig gikan sa ibabaw nga naglakip sa bukirang bahin sa dakbayan sa Sugbo. Unya motadlas sa dakbayan nga gumikan sa kagagmay sa kanal maoy hinungdan sa pag-awas sa tubig. (WC) (BANAT NEWS)