Davide mopalig-on sa emergency response sa lungsod

CEBU, Philippines - Gitinguha  sa bag-ong pamunoan  ni Governor Elect Hilario Junjun Davide III nga palig-onon ang Local Disaster Risk Reduction and Management Council (LDRRMC) sa kalungsoran ilabina  niining pagsulod na sa ting-uwan.

Matud  pa ni Davide  nga  iyang  gitugyan ang  pagpanguna sa tanang  mga  naumol  nga LDRRMC  kang Neil  Sanchez  ang  bag-ong  natudlo  nga  hepe  sa Provincial  Disaster Risk Reduction and  Management Council (PDRRMC)

Hinuon  si  Sanchez  nagkanayon  nga ilang nakita nga dili pa gyud organisado ang local disaster team sa kalungsoran sa probinsiya sa Sugbo.

Giklaro ni Sanchez  nga  isip  siya ang  taas  og  kasinatian  niini  ,  gusto niyang  matuman  ang  programa  sa kagamhanan  sa lalawigan  nga  iyang  pangunahan.

Apan   atol sa interview sa Bantay Radyo gipasalig  hinuon  ni  Sanchez  nga trabahoonon pa nila  ang  pagpundok sa  local disaster team sa kalungsoran. Kini  pinaagi  sa hingpit nga pagkaumol sama  sa  Emergency Response Team (ERT) diha sa matag lungsod.

Gipasabot ni Sanchez ang kamahinungdanon sa dinaliang pagkaumol sa ERT sa kalungsoran tungod kay mao man kini ang frontline kon mag-una sa pagtubag kun  adunay motumaw nga kalamidad  sa palibot.

Hinuon  miingon  si Sanchez  nga  sa pagkakarun pabiling alerto ang provincial  disaster team (PDT) dungan ang pagpakig-alayon sa kalungsoran aron kanunay kining andam sa mga motumaw nga kalamidad sama  sa landslide, baha   ug  uban  pa   niining   panahon  nga  ting-ulan. (/WC) (BANAT NEWS)