Pamilya sa napatay nga polis nabalakang panimaslan

CEBU, Philippines - Gipasakaan na’g kasong murder ang suspek sa pagpusil patay kang PO2 Gerlito Estremos kagahapon nga si Ian Canseco,34, nga taga Sambag II, Cebu City diha sa Cebu City Prosecutor’s Office.

Ang pagpatay nahitabo niadtong Hunyo 8 sa alas 2:40 a.m. atubangan sa bangko sa P. del Rosario St., Barangay Kamagayan, Cebu City.

Si City Prosecutor Nicolas Sellon nimando ni Assistant Prosecutor Simaco Labata pagpahigayon og inquest proceeding batok sa suspek diha sa Cebu City Jail diin nabalhog si Canseco.

Niadtong Huwebes, si Judge Samuel Malazarte sa Regional Trial Court Branch 15 miisyu na og commitment order batok kang Canseco tungod kay nag-atubang og kasong illegal nga paghupot og drugas. Base sa report, si Canseco nadakpan niadtong Lunes sa gabii sa barangay Kamagayan pinasikad sa warrant of arrest tungod sa kaso niini bahin sa illegal drugs. Si Canseco maoy gitumbok sa mga testigo nga maoy mikulata ug mipatay sa maong polis. Si Elmera Estremos, asawa sa biktima nagkanayon nga malipayon siya nga nasang-at na ang kaso. Nabalaka siya karon sa ilang seguridad tungod sa kabalakang panimaslan sila sa pamilya ni James Flores nga napatay sa mga polis.

Si Flores maoy gitumbok nga driver  ni Canseco atol sa pagpatay sa biktima apan napatay usab kini sa miaging gabii human giingong misukol dihang arestuhon unta.

Kahinumduman nga niadtong Hunyo 8 nag-roving ang biktima ug nangita sa  duha ka mga lalaking nagmotor nga giingong mikawat sa iyang helmet apan iyang nasugatan sila si Canseco ug Flores diha sa eskina sa P. Del Rosario ug Junquera Streets. (Mylen Manto/EIM) (BANAT NEWS)