CEBU, Philippines - Gipahimangnoan ni DOH Assistant Secretary Dr. Eric Tayag ang publiko nga likayan ang pagkaon og dili na preskong pagkaon aron di magkalibanga.
Ang pahimangno ni Tayag iyang giluwatan human sa nahitabo sa pagkalanag sa 43 ka mga priso sa Danao City Jail ug dugang 13 na usab ang nangalanag niadtong Domingo sa mao gihapong siyudad.
Nasuta nga ang duha ka mga kaso sa pagkalanag tungod sa pagkaon og litsong baboy usa ray gipalitan og litson diha sa barangay Poblacion sa maong siyudad.
Sumala pa ni Tayag mas maayo nga preskong pagkaon o ba kaha kadtong init pa nga pagkaon ang kaonon aron masigurong wala kini kagaw nga makita sa mga pagkaong daling madunot.
Gipasidan-an usab ni Tayag ang publiko nga kinahanglang pabukalan gyud ang ilang tubig nga ilimnon.
Ang sakit nga cholera, typhoid fever ug diarrhea sagad makuha sa hugaw nga pagkaon ug hugaw nga tubig mainom. Mas peligro sa kontaminasyon ang mga tinubdan sa tubig panahon sa ting-ulan tungod sa baha. (/EIM) (BANAT NEWS)