CEBU, Philippines - Mga residente sa sitio Bontores barangay Mohon, dakbayan sa Talisay midepensa sa ilang silingang giplanohang pasakaan og kaso tungod sa giingong pagsablig og asido ngadto sa duha ka mga iro nga nangamatay sa miaging semana.
Kahinumduman nga niadtong Hunyo 4, 2013 usa ka Marcial Lumayag, ang mipasaka og reklamo diha sa ilang barangay batok kang Alfred Alindao, residente diha sa sitio Bontores tungod sa pagsablig niini og asido sa duha ka mga iro. Ang duha nangamatay niadtong miaging semana tungod sa epekto sa asido diha sa ilang panit.
Ang kapitan sa barangay nga si Dario Villaver nga nahinabi sa mga tigbalita nagkanayon kini nga si Alindao miangkon sa kalapasan nga iyang nahimo ug misaad kini nga dili na mousab sa iyang gibuhat.
Nasuta sa mga tigbalita nga dihay usa ka adlaw nga wala makatrabaho si Alindao tungod kay nag-atang ang mga iro sa ilang agianan, dihang gipangita niini kung kinsay tag-iya sa mga iro walay nangangkong tagtungod.
Agi og depensa sa kaugalingon nagdala siya og asido ug dihang gigukod siya pag-usab sa iyang pagpauli gikan sa trabahoan gisabligan niya niini ang mga iro.
Ang Cebu South Dog Club mibahad nga mopasaka og kasong paglapas sa Animal Welfare Act batok kang Alindao.
Apan kagahapon sa hapon ang mga silingan ni Alindao miatubang sa mga tigbalita ug mipadangat sa ilang habig tungod kay sila nabiktima usab sa maong mga iro nga gipasagdan sa tag-iya.
Matud nila nga na-traumatized na ang ilang mga anak tungod sa pagsige og panggukod sa maong mga iro kanila, hasta sila kanunay nga gukdon ug usigon nga unta agianan man kini sa mga residente.
Si Villaver miangkon nga nagproblema gyud sila sa mga irong libudsuroy karong dili na manakop ang city veterinarian tungod kay wa na sila’y kabutangan niini. (/EIM) (FREEMAN)