Motor sa polis gi-carnap

CEBU, Philippines - Gisakiyo  sa usa ka  kawatan  ang motorsiklo  sa usa ka  polis  sa dakbayan  sa Mandaue nga  gi-parking   sulod  sa  compound  sa ilang buhatan  kagahapon  sa alas 4:00  sa kaadlawon.

Ang  biktima  nga  si SPO2 Brian Berenguer  nagkanayon  nga  paggawas  niya aron  mosakay  sa iyang motor  wala  na  kini .

Tungod  niini  gibati na  sa  hilabihang  kahasol  ang  mga  kapolisan sa maong  dakbayan  tungod  sa pagsiaw  pag-ayo  sa  carnapping  sa  palibot  sa Mandaue.

Si PO2  Berenguer nga sakop sa  Public Safety Company sa Mandaue City Police Office (MCPO) maoy tag-iya sa  XRM  nga nagtangag sa plate number nga 5089 GD.

Matud pa ni Berenguer nga ang iyang motorsiklo iyang gi-parking  atubangan sa Traffic Management Unit (TMU) nga nahimutang sa sulod sa compound sa MCPO.

Kagahapon  sa alas 4:00  sa  kaadlawon,  mouli na  unta  siya  dihang  pagsil-ing  niya  sa iyang  sakyanan,  wala  na  kini.

Si PO1 Crestito Raboy   sa Investigation Detection and Management  Bureau (IDMB) nga naghimo og  pakisusi miingon nga ang tag-iya sa carenderia nga nahimutang sa maong dapit mitug-an nga sayo  sa kaadlawon nakit-an  niini  ang  wala hiilhing lalaki nga  nagtrapo-trapo sa motorsiklo.

Dihang  hinlo  na  kini,   yano  kaayo niining  gisakyan   ang  motorsiklo  padulong sa dalan nga nahimutangan usab sa Bureau of Fire Protection (BFP) sa maong dakbayan.

Ang nakakita nga tag-iya sa nahisgotang kan-anan  gipatan-aw sa photo  gallery sa mga dautang elemento nga natala sa MCPO  apan  napakyas  gayud siya  sa pag-ila niini. (BANAT NEWS)