Way dautan pagsulod sa fraternities–Sr. Supt. Natu-el

CEBU, Philippines - Way dautan sa pagsulod sa fraternity basta pilion lang ang mga tarong nga grupo, sumala pa sa director sa Cebu City Police Office nga si Sr. Supt. Mariano Natu-el Jr. kagahapon.

Ang pamahayag ni Natu-el iyang gibutyag human sa nahitabong pagkasakop sa usa ka initiation rites sa Alpha Kappa Rho fraternity niadtong Domingo sa sitio Tabok Kanal sa barangay Pardo ning siyudad.

“Wala may sayop nga mojoin ka sa fraternity,  kaso lang ang process sa pag-join sa fraternity that would cause death,”pasabot pa ni Natuel kinsa miingon nga kabahin sa pagtubo sa kabataan ang pagsulod og mga organisasyon.

Nunot niini, buot ni Natu-el nga ibalik ang pagpahigayon og mga symposiums aron ma-edukar ang kabataan kabahin sa peligro sa pagsulod sa mga gangs.

Giawhag usab ni Natu-el ang mga tunghaan nga estriktuhon ang guidelines sa mga fraternities diha sa ilang mga eskuylahan. Nasakpan ang initiation rites sa Pardo niadtong Domingo tungod sa tiyabaw sa mga gi-initiate. Nakuha sa kapolisan ang usa ka paddle nga gituohang maoy gigamit sa pagbunal sa duha ka bag-ong miyembro.

Apan matud pa sa hepe nsa Pardo Police Station nga si  Chief Insp. Jul Mohammad Jamiri wala silay mapasakang kaso sa pagkakaron tungod kay wala mosang-at og reklamo ang mga nanulod sa grupo nga sila si Stephen Ocampo ug Romel Ybañez kinsa pulos na mga hingkod ang panuigon.  (BANAT NEWS)