CEBU, Philippines - Mga proyekto ni Kongresista Eduardo Gullas sa unang distrito sa probinsiya sa Sugbo padayonon sa iyang apo nga si Congressman-elect Samsam Gullas.
Si Samsam nga nahinabi sa mga tigbalita kagahapon nagkanayon nga padayonon niya ang mga proyekto sa iyang apohan diha sa distrito.
Usa sa mga naglangkub nga proyekto ni Eddigul mao ang pagpalapad sa kadalanan diha sa mga dakbayan ug kalungsoran nga ubos sa iyang distrito.
Gawas niini bisan og ang iyang apohan napildi isip pagkamayor sa dakbayan sa Talisay sa milabay’ng eleksiyon si Samsam misaad kini nga padayonon gihapon niya ang mga proyekto nga nasugdan sa iyang apohan diha sa dakbayan.
Usa sa maong proyekto mao ang fish port nga nahimutang diha sa barangay Tanke.
Matud usab ni Samsam nga makigtinabangay siya sa umaabot nga administrasyon alang sa kalamboan sa siyudad.
Si Samsam nagkanayon kini nga tumanon usab niya ang gisaad sa iyang apohan kabahin sa pagbutang og puhonan ngadto sa kooperatiba nga tukoron sa mga drayber sa traysikad ug traysikol diha sa Talisay. (BANAT NEWS)