CEBU, Philippines - Bisan nalibkas na ang liquor ban sa miaging midterm election, higpit pa gihapong gidili ang magdala og ilimnon nga makahubog sa mga buhatan sa gobiyerno.
Kini ang pahinumdom sa Civil Service Commission (CSC) sa mga empleyado sa gobiyerno base sa CSC Resolution 1100039.
Ang maong resolusyon hugot nga nagdili sa pag-inom og mga ilimnon nga makahubog sa oras sa tingtrabaho sulod sa opisina sa kagamhanan.
Matud pa ni CSC Chairman Francisco Duque, ang pag-inom sulod sa oras sa tingtrabaho o pagsulod sa trabaho nga nakainom apil sa administrative offenses.
Wala’y labot niini ang silot alang sa habitual drunkenness.
Gitugotan lamang nga mo-inom ang mga empleyado kun adunay programa, espesyal nga kalihokan, ug kun may pagsaulog sa mga lokal nga kasaulogan ug tradisyon.
Apan ang pag-inom og bino nga ginagmay mao lamang ang gitugot ug hugot nga gidili ang paghubog-hubog.
Giingong mahimong manubag ang empleyado, apil na ang pangulo sa opisina kun adunay dagkong butang mahitabo gumikan sa pag-inom og subra nga ilimnong makahubog.
Ang masakpan nga nakainom o naghubog-hubog sa oras sa trabaho mahimong masuspinde og usa hangtud 6 ka buwan sa unang higayon samtang kun mausab pa kini, mahimong matangtang na sa trabaho ang masakpang empleyado. (BANAT NEWS)