4 ka oposisyon sa PB may komitiba–Magpale

CEBU, Philippines - Gipasalig ni Bise-Gobernador Agnes Magpale nga adunay komitiba nga makuptan ang upat ka sakop sa hunta probinsiyal sa habig sa oposisyon. Ang upat  mao sila si Bokal Julian Daan sa unang distrito, Alex Binghay sa ikatulong distrito, Sun Shimura ug Joven Mondigo Jr. sa ikaupat nga distrito sa lalawigan sa Sugbo.

 Makigtagbo si Magpale sa tanang sakop sa hunta probinsiyal karong semanaha aron han-ayon na ang ilang tagsatagsa ka komitiba sa dili  pa sila pormal nga molingkod sa katungdanan karong udtong tutok sa Hunyo 30.

Ang mga bag-ong sakop nga napili sa niaging eleksiyon mao sila si  Raul Alcoseba sa unang distrito, Christopher Baricuatro sa ikaduhang distrito ug Grecilda Sanchez-Zaballero sa ikatulong distrito. Si Bokal Miguel Antonio Magpale sa ikalimang distrito una pang pagkapili apan naglingkod na siyang daan sa hunta probinsiyal hulip sa pwesto sa iyang inahan nga si Agnes.

Si Agnes misaka sa pagkabise-gobernador human sa pagkamatay ni  kanhi  bise  gobernador  Gregorio Sanchez Jr. niadtong Abril 29, 2011. Mayoriya sa mga sakop sa hunta probinsiyal nga midaug sa miaging eleksiyon mga sakop sa Liberal Party nga mga kaalyado sa bag-ong napiling gobernador, Hilario Davide III, ug Magpale.

 Sa iyang bahin si Zaballero nagkanayon nga dili siya mopili kung unsa nga komitiba ang gusto niyang kuptan.

 Matud pa ni Zaballero nga andam siya modawat kung unsa nga komitiba ang ihatag kaniya sa grupo. (BANAT NEWS)