LTO mosuta kun ang tinun-an may discount ba

CEBU, Philippines - Mopasiugda ang buhatan sa Land Transportation Office (LTO) og random survey sa kadalanan sa pagsuta sa mga tinun-an kun nakapahimulos  ba sila sa 20 porsiyento nga diskuwento sa ilang plitehan.

Ang 20 porsiyento nga diskuwento sa mga tinun-an  maoy hugot  kaayong gipatuman sa kagamhanan sama usab sa mga senior citizen ug mga tawo nga adunay kabilinggan sa panglawas.

Ang random survey nga pagahimoon sa LTO 7  gitumong aron  sa  pagpahinumdom sa mga drayber sa publikong sakyanan nga ang mga tinun-an nga nagsugod na sa pagsulod sa ilang klase ang adunay katungod sa pagpangayo og 20 porsiyento sa kantidad sa ilang plite sa matag sakay paingon sa ilang tulunghaan o paingon sa pagpauli sa ilang   balay.

Si LTO 7 Regional Director Raul Aguilus sa iyang pamahayag sa mga tigbalita miingon nga ang random survey nga pagahimoon walay kalainan sa random drug test nga gipahigayon nga gitumong usab alang sa pagsuta sa mga drayber nga nalambigit sa paggamit sa illegal nga drugas.

Matud pa niya nga mahimong mopadangat sa ilang reklamo ang mga tinun-an ngadto sa buhatan sa Land Transportation Franchising and Regulatory Board (LTFRB) 7  .

Samtang  ang mga tinun-an nga mabiktima sa abusadong mga drayber sa  PUJ nga magdumili sa paghatag og 20 porsiyento nga diskuwento  kinahanglang sagubangon  kini  sa katawhan.

Sa nasayran nga ang pipila ka mga drayber sa mga sakyanang pasaheroan  nasakpang  nalambigit sa paggamit sa illegal nga drugas sa gipahigayon nga random drug test sa mga kawani sa LTO  7. Ang pagpasiugda og random drug test sa LTO 7 ilang gitumong sa tinguha usab nga kalikayan ang mahitabong aksidente sa mga sakyanan sa kadalanan nga makaingon sa daghang kinabuhi nga makalas.  (BANAT NEWS)