CCMC mopalit og MRI gamit ang pundo gikan DOH
CEBU, Philippines - Ang Cebu City Medical Center (CCMC) gipaabot nga makadawat og P50 milyones nga hinabang gikan sa Department of Health (DOH) aron ipalit og medical equipment nga gitawag og Magnetic Resonance Imaging (MRI).
Matud ni CCMC director Gloria Duterte nga ang kantidad sa usa ka MRI gibana-bana nila nga mokantidad usab og minilyon ka pesos mao nga mahal kaayo ang bayad kun adto pagpa-laboratory sa pribadong ospital.
Ang CCMC wala pa gyud makaangkon niining maong matang sa kahimanan sukad-masukad mao nga gihangop ni Duterte ang pag-aprobar sa DOH sa ilang hangyo nga tabangan sila nga makaangkon og MRI.
Si Duterte nangayo unta sa DOH og P200 milyones aron gamiton sa pagpatukod og bag-ong hospital building ug laing P100 milyones para ipalit og mga medical equipment.
Apan gibalibaran kini sa DOH kay wala nila kini suportahi og kompleto nga dukomento sama sa Programs of Works and Estimates (POWE).
Giingnan hinuon si Duterte sa mga opisyal sa DOH nga mosumiter pagbalik og hangyo ug siguroon nga kompleto na ang ilang dokumento sa dili pa ang Pebrero sunod tuig.
Gikan kaniadtong Enero ngadto sa Marso kapin na sa 30,000 ka kabus nga pasyente ang naalagaran sa CCMC ug sa pagtapos karong buwana gipaabot nga modoble ang maong gidaghanon. (/EIM) (BANAT NEWS)
- Latest
