CEBU, Philippines - Patay nang napalgan ang usa ka 33-anyos nga lalaki nga gituohang naghikog pinaagi sa paghigot og cable wire sa iyang liog sa sulod sa ilang panimalay sa Sta. Monica Village sa sitio Timpolok, barangay Babag, dakbayan sa Lapulapu alas-2 pasado ang takna sa miaging kaadlawon.
Giila ni PO2 Jerson Alparito sa Homicide Section sa maong dakbayan ang namatay nga mao si Dionesio Niepes Duonis, 33, bulag sa asawa ug nagpuyo sa maong dapit.
Matud pa ni Alparito nga natugaw ang mga sakop sa pamilya dihang napalgan si Dionesio nga nagbitay sa sulod sa lawak sa ilang panimalay.
Gidala pa unta kini sa Mactan Doctors Hospital apan patay na. Nasuta nga dunay suicide note nga nakuha gikan sa lawak apan igo ra king nagpasalamat sa mga higala ug paryente ug wala ang hinungdan sa iyang paghikog. (/EIM) (BANAT NEWS)