Smuggled Vietnam rice gi-bidding

CEBU, Philippines - Upat ka mga kompanya maoy nakadaog sa unang hugna sa bidding sa mga nasakmit nga smuggled rice gikan sa Vietnam nga gipahigayon kagahapon diha sa Bureau of Customs Port of Cebu.

Ang bidding alang sa upat ka slots nga mokabat og dul-an P41 milyones gihimo diha sa buhatan ni Cebu Customs District Collector Edward dela Cuesta.

Onse ka mga accredited bidders gikan sa Mindanao ug Luzon ang miapil sa bidding apan upat lang ang nakadaog nga mao ang ETB Agro (slot 1);  Dragon Grains (slot 2);  ang slot 3 nakuha sa Angel Gabriela  ug ang  slot 4 mao ang MNSP Gen. Merchandise.

Matud pa ni Collector dela Cuesta ang maong bidding tipik lamang sa 1,169 container vans nga ilang nasakmit gikan sa nasud sa Vietnam nga gipalusot dinhi sa Sugbu. Sumala pa niya nga si Customs Commissioner Ruzzano Ruffy Biazon maoy mimando kanila sa pagpahigayon sa maong bidding.

Ang mga mananaug gipabayad dayon og 50% sa ilang presyo sa bidding ug ang katunga niini kinahanglan mabayran karong adlawa sa dili pa ihikay sa customs ang pagpagawas sa maong mga bugas. Matud pa ni Cuesta wala nila iapil ang walo ka mga consignees nga gidudahang maoy  responsable sa pagpayuhot sa mga bugas. (EIM) (BANAT NEWS)