Kapitan sa barangay angol sa disgrasya

CEBU, Philippines - Naangol ang kapitan sa barangay ug 19 anyos nga lalaki dihang nagkabangga ang ilang motorsiklo didto sa barangay Campangga sa lungsod sa Barili niadtong Lunes sa alas 6:00 sa  gabii.

Ang biktima mao si Kapitan  Jonas Benondo, hingkod, sa barangay Mayana, Barili ug  ang drayber sa gikabangga niining motor mao  si Hermogenes Estomo  Jr., 19, ulitawo ug nagpuyo sa barangay Bagacay, Barili.

Si PO2 Llyod Sebial sa Barili  Police  Station mibutyag  sa Banat News   nga  ang biktima gikan sa barangay Nasipit ug paingon sa merkado sa lungsod,  samtang   si Estomo gikan usab sa lungsod nga  iyang  gikasugat.

Matud pa nga  samtang nagdagan  sila sa likoon nga karsada sa barangay,  pag-abot nila sa dapit,  wala  sila  makabantay  sa  usa  ug  usa  nga  mikawat sa pikas linya hinungdan nga nagkadinasmagay   sila.

Pulos usab  sila   nangalabay sa tagsa- tagsa nila ka motor nga ilang gisakyan.

Ang mga tawo nga nahiagi sa maong lugar paglabay   sa  pipila  ka  gutlo mao nay mitabang  kanila ug mihatud  ngadto  sa Barili District Hospital. Hinuon   si kapitan Benondo gi-refer sa tambalanan dinhi sa dakbayan sa Sugbo tungod sa iyang dakung kadaut sa tuhod ug ubang bahin sa lawas nga operahanan.

Samtang ang 19  anyos nga si Estomo nakagawas dayon  sa tambalanan human madapati og tambal. (BANAT NEWS)