Duha ka dispatser gi-dispatsa patay

CEBU, Philippines - Duha ka mga giingong bugoy-bugoy nga dispatser ang gipamusil patay sa duha ka wala mailhing mga lalaki nga nagsakay og motorsiklo sa managlahing oras sa parehong lugar sa barangay Buaya sa dakbayan sa Lapulapu Lunes sa gabii.

Ang mga biktima mao si Jubar Amimita, 23, Viel Casio, 23, mga residente sa maong dapit ug pulos mga PUJ dispatchers sa maong dapit.

Sa pasiunang imbestigasyon sa kapolisan pinangulohan ni P/Insp. Zenaido Pastorfide nasuta nga mga alas 6:30 sa milabay’ng gabii si Amimita maoy unang gipusil sa usa ka tawo nga nagmotorsiklo habig sa eskina Saac, Brgy. Buaya duol sa merkado.

Natusaktusak sa bala ang lawas ni Amimita nga maoy nakaingon sa iyang hinanaling kamatayon. Apan wala pa gani mahuman ang crime scene investigation sa kapolisan diha sa Saac ug bisan dunay mga polis sa maong dalan gisunod og pusil sa unahan nga bahin si Casio. Si Casio nakaangkon og tulo ka samad pinusilan sa iyang lawas nga maoy nakaingon sa iyang hinanaling kamatayon.

Usa ka traffic enforcer nga nadestino sa maong dapit mipadayag sa kapolisan nga posibleng sila lamang ang gibantayan sa mga suspek tungod kay bag-ohay pa lang milabay ang patrol car sa kapolisan  nahitabo dayon ang pagpamusil.

Nakuha sa kapolisan ang 10 ka basiyo   sa bala nga kalibre .45 sa dapit nga nahitaboan ni Amimita ug tulo usab ka basiyo ka bala sa kalibre .45 sa habig ni Casio.

Susihon pa karon sa kapolisan kung usa ra ka mamumuno ang mihimo sa krimen ug kung gikan ba sa usa ka armas ang mga bala nga mikutlo sa kinabuhi sa duha.

Ang mga gunmen pulos miikyas sa direksyon padung sa Brgy. Mactan dakbayan sa Lapulapu. Nasayran sa Banat news nga si Amimita ug Casio kanunay nang masikop sa kalapasan sa ordinansa sa dakbayan sa Lapulapu sa “illegal dispatching.”

Gidudahang dunay mga tawo o driver nga nasuko o nasuya kanila hinungdan sa maong krimen. Samtang ang kapolisan padayon pa ang kapolisan sa pag-establisar kung unsay motibo ug kinsa ang responsable sa maong pagpamusil ngadto sa mga biktima. (BANAT NEWS)