Nangawat og P3mil sa bakery sikop

CEBU, Philippines - Gitanggong  sa  buhatan  sa kapolisan  ang usa ka bayong-bayong  kinsa gipasanginlang  mikawat  sa P3 mil  nga halin  sa us a ka bakery  sa  R.R Landon Extension ,  sa Barangay Sambag 1 Syudad sa Sugbo  kagahapon  sa alas 3:00  pasado  sa kaadlawon.

Ang maong  suspetsado  giila  lang  sa ngalang    “Dodong”, 14 ,  nga  taga Sitio Camansi, barangay Quiot, syudad sa Sugbo.

Matud ni  SPO2 Oliver Glodove sa Fuente Police Station kinsa maoy nangulo sa pagresponde sa maong   alarma  sa kawat,  nga ang sales clerk sa Arbees  Bakeshop  maoy  misumbong  sa ilang  buhatan  kagahapon  sayo  sa buntag. Sa pasiunang  imbestigasyon  sa kapolisan  nasuta nga  ang sales clerk nga si Riza Damayo, 25, nakatulog sa maong  higayon hinungdan  nga sayon  ra kaayong nakapangawat  ang  suspetsado  sa  kuwarta  nga  didto  sa sulod  sa kaha sa maong bakery.

Hinuon  pagmata  ni Damayo  mao  usay paggawas  sa kawatan  ug  nasikop  usab  dayon  kini  sa ubang  mga  trabahante  sa bakery.

Sa dihang nahinabi sa Banat  News ang bata wala kini molimud sa maong pagpangawat ug misulti nga gigalgal ra siya sa iyang kauban nga si Arnel Barra,24 kinsa nakaila  niya didto sa dalan  Colon samtang  siya magduwa-duwa kauban sa iyang mga amigo.

Gibawi  nila  ang  P3 mil  nga  gikawat  sa suspetsado  kinsa  gitunol  usab  dayon  nila sa  kapolisan  nga miresponde  sa maong  alarma  ug  gitakda  sa kapolisan s a Fuente  Police  Station  nga  itunol  nila  ang  suspetsado  ngadto  sa buhatan  sa Department  of Social  Welfare  and  Development (DSWD)7  kinsa  maoy  may katungod   sa pag-atiman  niini. WC (BANAT NEWS)