Koral sa CPA gub-on sa City Hall – Poblete

CEBU, Philippines - Kun hangtud karong Miyerkules dili gihapon kuhaon sa mga opisyal sa Cebu Port Authority (CPA) ang koral  nila nga  puthaw  sa palibot sa karaang Compania Maritima, ang mga kawani sa City Hall na maoy mularot niini.

Mao kini ang pasidaan ni Cebu City Administrator Jose Marie Poblete human moinsister  si Mayor Michael Rama nga ipatangtang  gyud  ang maong koral nga gisugdan na pagtukod sa CPA palibot sa luna nga giangkon nila nga ila.

Matud ni Mayor Rama nga nagtuo siya nga wala’y papeles nga gihuptan ang mga opisyal   sa CPA nga magpakita nga sila maoy tag-iya sa luna nga ilang giangkon tupad sa karaang pantalan sa Compania Maritima.

“Ngano, ila na? Sila maoy tag-iya ana? Naa sila’y papeles?” matud sa mayor agi og reaksyon sa  pag-insister sa   mga opisyal sa CPA ila  ang  maong  luna  busa  ilang  kuralon.

Buot  nilang  sakupon  ang karaang Compania Maritima   uban  sa tulo ka parcela   nga  luna nga na-reclaim sa Department of Public Works and Highways (DPWH).

Gusto ni Rama nga ang maong lugar nga nahimutang tupad sa Senior Citizens Park himoong parking area sa mga sakyanan sa mga kliyente nga adunay  transaksyon sa City Hall nga dili maka-parking sa Plaza Sugbo.

Si Atty. Yusop Uckung nga maoy chief legal officer sa CPA miingon nga adunay Memorandum of Agreement nga gipirmahan sa DPWH ug CPA kaniadtong 2003 nga nagpakita nga gitugyan na kanila sa CPA ang pagdumala sa maong luna.

Ang tulo ka parcela nga luna nga na-reclaim gikan sa kwarta sa DPWH dungan sa paghimo sa rampa ug tunnel paingon sa Plaza Independencia gitugyan sa DPWH ngadto sa CPA.

Si City Administrator Poblete nga usa usab ka abogado nagkanayon nga human ma-reclaim ang maong lugar nga dagat kaniadto, dili ang DPWH maoy tag-iya kun dili ang Department of Environment and Natural Resources.

Ang pamahayag ni Poblete nagpalig-on sa baruganan ni Mayor Rama nga wala pa’y katungod ang CPA nga mangangkon nga sila ang tag-iya sa luna labaw na sa pagtukod og koral nga wala’y permit sa Office of the Building Officials. WC (BANAT NEWS)