CEBU, Philippines - Nasikop sa kapolisan ang usa ka security guard nga mikawat sa P25,000 nga kuwarta sa usa ka beach resort didto sa Brgy. Basdiot, lungsod sa Moalboal sa miaging Miyerkules sa udto.
Si PO3 Fabio Fernandez ug PO1 Eric Bonbong sa Moalboal Police Station miila sa suspetsado nga si Raymundo Diomedes, 32, minyo, nga taga Brgy. Polo, lungsod sa Alcantara, samtang ang biktima nga maoy tag-iya sa kuwarta giila sa kapolisan nga si Faye White, 48, minyo , nga nagpuyo sa maong lugar ug maoy tag-iya sa Turtle Beach Resort sa Basdiot.
Matud pa ni PO3 Fernandez nga sa pasiunang imbestigasyon sa kapolisan sa Moalboal, nasuta nga ang suspek nakita sa footage sa Closed-Circuit Television (CCTV) Camera nga misulod sa lawak sa biktima ug mikuha sa kuwarta niini.
Midugang siya nga naklaro ang dagway ug mga lihok sa suspek dihang nabantang kini sa camera.
Base sa CCTV misulod ang suspek sa lawak ug gikuha niini ang usa ka kahon nga gisudlan sa kuwarta nga gipapilit didto sa bungbong pinaagi sa tape.
Midugang si PO3 Fernandez nga nakonpirma kini nila dihang miangkon mismo ang suspetsado sa iyang pagkuha sa kuwarta didto sa buhatan sa kapolisan ug gani nangayo kini og pasaylo sa tag-iya.
Matud niya nga giuli sa suspek ang di momenos sa P10, 000 nga mao nala’y nahabilin kay nagasto na niya ang uban.
Kasamtangang nagka-gulkol kini karon sa prisohan sa kapolisan sa maong lungsod samtang gipaabot ang tukmang kiha nga ipasaka batok kaniya. (BANAT NEWS)