CEBU, Philippines - Napasakaan na og kasong kriminal ang duha ka babayeng giingong mga bigtime drug pushers nga nadakpan niadtong Huwebes sa Cebu City Prosecutor’s Office.
Illegal possession of shabu ang kasong giatubang nila ni Grace Abellana, 38, nga taga Barangay Suba og Liza Tero 31, taga Barangay Pasil.
Ang mga suspetsado nadakpan sa kapulisan niadtong Martes sa gabii sa Barangay Suba tungod sa impormasyon sa usa ka molupyo sa Pasil nga dunay mahitabong transaksyon sa illegal nga drugas sa ilang dapit si Abellana ug Tero.
Matud pa nga nakit-an nila si Abellana nga dunay gipatan-aw kang Tero diha sa sud sa iyang bag hinungdan nga sila nadakpan.
Nakuha gikan kang Abellana ang walo ka dagkong putos sa shabu nga susama kadagko sa ice water. Laing duha ka medium packs usab sa gituohang shabu ang nasakmit gikan ni Tero. Gibanabana sa kapolisan nga nagkantidad og P4 milyones ang kinatibuk-ang street value niini.
Giingong ang duha maoy suppliers og shabu sa Cebu City, Lapu-Lapu City, Mandaue City ug Talisay City.Ang duha kusganong mihimakak sa pasangil ug mipasangil sa mga polis nga didto sila gidakop sa mga polis sud sa ilang mga balay ug dili sa dalan. (BANAT NEWS)