CEBU, Philippines - Duha ang naangol apil na niini ang manghod sa kanhi mayor sa lungsod sa Consolacion dihang sila gipamusil samtang nagduwa og mahjong diha sa District 5 barangay Pulpogan Consolacion alas 11:25 sa gabii niadtong Miyerkules. Ang mga biktima mao si Joselito Gungob alyas Lito, 51, ug kaduwa nila nga si Julius Gerona, 25, taga barangay Garing, Consolacion.
Samtang wala pa maila sa kapolisan ang gunman nga giingong kalit lang misud sa mahjongan ug gipaulanan og bala si Gungob.
Matud ni PO2 Johnaskie Romero sa Consolacion Police Station nga nahinabi sa Banat News gipusil makadaghang higayon si Gungob apan ang usa sa mga bala nga miigo kaniya giingong milapos padung kang Gerona nga diha sa iyang tupad.
Pagkahuman sa pagpamusil daling miikyas ang maong lalaki sakay sa usa ka motorsiklo nga wa makuha ang plate number. Ang kapulisan padayun pa karun sa ilang hot pursuit operation pagsikop sa suspek ug pagtino sa motibo sa krimen.
Matud ni PO2 Romero si Gungob nadakpan na nila kini kaniadto tungod sa paghupot og armas apan nakapiyansa. (BANAT NEWS)