CEBU, Philippines - Gipasidan-an ang mga sibyahanan sa radio nga magsagubang sila sa silot nga multa gikan sa P30 mil ngadto sa P50 mil kun mosipyat sila sa pagtuman sa oras nga itakda sa weather bureau. Ang pasidaan gihimo kagahapon ni Engr. Alfred F. Quiblat, Officer-in-Charge (OIC)Chief sa Philippine Atmospheric Geophysical and Astronomical Services Administration (PAGASA) atol sa Kapihan sa PIA nga gipalanog sa DYMR Radyo ng Bayan Cebu.
Matud pa ni Quiblat ang multa nga P30 mil maoy isilot sa unang sipyat sa sibyaanan, P50 mil sa ikaduhang higayon ug sa ikatulo kanselahon na ang prangkisa sa maong sibyaanan.
Miingon si Quiblat nga gihigpitan sa balaod Republic Act (RA)10515 ang pagpatuman sa tukmang oras aron sundon sa tanang buhatan ug ahensya sa kagamhanan ang pagbaton og managsama nga oras. Usa sa tumong niini sumala ni Quiblat mao nga aron ang Pilipinas makabaton og tukmang sumbanan sa oras alang sa tanang kalihokan sa mga katawhan sa nasud.
Dinhi isandig sa tanang sector ang tukmang oras sa ilang mga kalihokan sa natad sa pamatigayon, eskuyla, simba, paugnat sa kusog ug tanang kalihokan sa mga Filipino matag takna.
Gumikan niini nagkanayon si Quiblat nga dako kaayo og kaakohan ang mga sibyaanan sa radio sa pagpadangat sa tukmang takna ngadto sa publiko. Sumala sa maong balaod ang mohatag sa Philippine Standard Time (PST) mao ang ulohang buhatan sa PAGASA sa Manila o kaha sa lokal nga buhatan niini dinhi sa Mactan, Cebu.
Si Quiblat mipahimangno sa mga tagdumala sa sibyahanan sa radio nga tahasan nila ang ilang mga sign-on technician o kaha sign-on announcer sa pagsakar sa ilang oras sa buhatan sa PAGASA matag bukas nila sa ilang sibya sa kahanginan sa kabuntagon. (BANAT NEWS)