Cebu City na- ‘over draft’ og dul-an P1 Bilyon

CEBU, Philippines - Naghinobra ang gasto sa dakbayan sa Sugbo sa miaging tuig nga ang iyang revenue koleksyon wala na makasugakod ug ang “overdraft” miabot og dul-an sa usa ka bilyon ka pesos.

Base sa Audit Observation Memorandum sa Commission on Audit (COA) nga nakuha sa Banat News nagpakita nga ang “cash” sa dakbayan kaniadtong Disyembre miabot na lang og P1,016,168,077 apan aduna kini bayranan nga P1,981,726,126.

Ang observation report sa COA nga gipadala sa buhatan ni Mayor Michael Rama nagkanayon nga ang overdraft miabot og P965.5 milyones.

Matud ni Cebu City Auditor Cymbeline Celia Chiong Uy nga klaro kaayo nga ang kagamhanan sa dakbayan nakalapas sa balaod nga gilatid sa Government Accounting and Auditing Manual ug sa Local Government Code.

Tungod sa pagkakuwang og pundo sa dakbayan sa Sugbo dili imposible nga ang kwarta nga gibutang sa trust funds nagamit sa pagtubag sa ubang mga panginahanglan.

Ang mga state auditors nagkanayon nga basi sa balaud ang trust funds adunay gastohanan nga gitagan-an ug dili kini angay’ng gastohon sa ubang bayranan.

Ang Section 337 sa Local Government Code naglatid usab nga samtang ang usa ka local government unit makahimo paggasto og sobra sa gitugot nga expenses apan kinahanglang dili kini molapas sa 50 porsiyento sa wala pa makolekta nga gibana-bana nga kitaon.

Matud sa COA nga tungod sa kadako og bayranan sa dakbayan sa Sugbo unya gamay ra ang iyang kwarta nga pundo, mahimong dili dayon mabayran ang ubang obligasyon sama sa bayranan sa mga contribution sa mga kawani ngadto sa PhilHealth, Pag-IBIG, Government Service Insurance System ug uban pa.

Giawhag sa COA ang administrasyon ni Rama nga paspasan ang pagpangolekta sa mga buhis aron nga matubag ang panginahanglan sa dagku niini nga gastohan. (BANAT NEWS)