CEBU, Philippines - Wala na makaabot nga mapupos ang iyang termino karong Hunyo 30, namatay niadtong Sabado sa hapon ang bise-mayor sa Alcoy nga si Antonio Plando.
Si Plando namatay sa edad nga 66-anyos sa sakit nga colon cancer ug ang haya anaa pa karon sa St. Peter Funeral Homes sa Imus Road, dakbayan sa Sugbo.
Matud ni Mayor Nicomedes delos Santos nga katapusang nipakita si Plando sa munisipyo niadtong Martes ug mao usab kadtong adlawa nga siya nadala sa Cebu Doctors Hospital .
Gihulagway ni delos Santos nga lahi na gyud kaayo ang panagway ni Plando ingon nga luspad ug luya na kaayo atol sa pagbisita sa munisipyo.
Wala na nagpapili si Plando sa niaging eleksiyon apan matud pa ni delos Santos nga aktibo gihapon kining nangampanya ilabi na nga ang anak nga si Neil Tracy nagpapili sa pagka-konsehal.
Niadtong Abril mipanaw usab ang igsoong babaye ni Plando sa mao gihapon nga sakit.
Nakig-alayon karon si delos Santos sa pamilya ni Plando alang sa pagpahigayon og bilar sa namatay nga opisyal diha sa munisipyo sanglit dad-on kini ngadto sa ilang lungsod karong Biyernes.
Kagahapon, ang Hunta Probinsiyal mipadangat sa ilang pahasubo sa banay ni Plando pinaagi sa pagpasar sa resolusyon nga gipangamahan ni Bokal Peter John Calderon.
Si Plando nagsugod sa pagpangalagad sa lungsod sukad pa sa tuig 1980. Nahimong bise-mayor sukad sa 1992 hangtud 2001 samtang si delos Santos pa ang mayor.
Human napupos ang termino ni delos Santos sa 2001, iyang gituboy pagka-mayor si Plando ug nibalik kini pagkabise-mayor sa 2004, 2007 ug 2010. (/EIM) (BANAT NEWS)