CEBU, Philippines - Lima pa ka buwan nga masuso namatay dihang nabangga ang ilang gisakyang van diha sa usa ka gi-park nga trak de karga sa daplin sa dalan sa barangay Dos sa lungsod sa Tuburan kagahapon sa alas 6:00 sa buntag.
Ang biktima nga patay diha diha mao si Kissh Mae Andre Compacion, taga lungsod sa Asturias ug lain pang 24 ka mga pasahero nga sagol mga bata ang naangol.
Naangol usab ang amahan sa namatay nga maoy drayber sa van nga si Richard Compacion.
Matud pa nga padung ang van sa mga biktima sa siyudad sa Bogo aron managkot dihang nahitabo ang aksidente.
Si PO2 Dexter Arapoc sa Tuburan Police Station nga nahinabi sa Banat News miingon nga gikan sa lungsod sa Asturias apan pag-abot sa maong lugar ang drayber miingon nga gisuwawan siya sa bidlisiw sa pagsubang sa adlaw.
Tungod niini nabutahan siya ug wala makabantay sa giparking nga trak ug nabangga sila niini. Ang drayber sa trak nga si Ronilo Martinquilla, 42, giimbitar na sa kapolisan aron pagsusi kung duna ba kini tulubagon sa maong aksidente.
Giingong nangalabay sa sud ang ubang mga pasahero lakip na ang masuso human sa panagbangga.
Duha lang sa mga naangol ang naa sa seryoso nga kahimtang ug gidala na sa tambalanan dinhi sa dakbayan sa Sugbo samtang ang 22 nga naangol anaa gidala sa Tuburan District Hospital. (/EIM) (BANAT NEWS)