CEBU, Philippines - Patay ang usa ka lalaki nga gidudahang padung untang mangawat sa balay sa iyang silingang polis human kini napusilan diha sa sitio Catugasan, barangay Casili, lungsod sa Consolacion, alas-11 pasado ang takna sa Domingo sa gabii.
Ang namatay giila nga mao si Roldan Piccio Gonzales, 42, lumad nga taga Misamis City ug temporaryo nga nagpuyo sa maong dapit.
Samtang ang nakapusil niya mao ang iyang silingan nga si PO1 Marciano Verdida, 30, sakop sa kapolisan sa dakbayan sa Lapulapu. Si PO3 Arthur Oriate, imbestigador sa kapolisan sa maong lungsod nga nahinabi sa Banat News miingon nga boluntaryo nga mitahan si PO1 Verdida ngadto sa ilang buhatan.
Gidala usab niya ang armas nga kalibre .45 pistola nga maoy iyang gigamit sa pagpusil kang Gonzales.
Matud pa ni Oriate nga sa imbestigasyon nga ilang gihimo ilang nasuta nga ang namatay nga si Gonzales misulay sa pagsulod sa panimalay sa maong polis pinaagi sa pagguba sa pultahan sa luyo sa balay.
Apan si Verdida nga nagpahulay na niadtong tungora nakamata sa kagulkol gikan sa luyo hinungdan nga iyaha kining gisusi ug gisangpit kung dunay tawo diha sa gawas sa balay.
Sumala pa nga wala motubag si Gonzales hinungdan nga kini gipabuthan ni Verdida.
Dihang gisusi sa mga imbestigador ang lawas ni Gonzales, nakuha kalibre .45 nga armas, duha ka pakete nga gituohang shabu ug duha ka ginamit na nga tin foil.
Sumala pa ni Oriate nga si Verdida temporaryong gitanggong samtang nagpadayon ang imbestigasyon pagtino sa pangangkon niini. (/EIM) (BANAT NEWS)