CEBU, Philippines - Duha ka mga lalaki ang patay sa buwag nga insidente sa pagpamusil sa siyudad sa Toledo niadtong Domingo usa niini tungod sa tigbakay nga nagubot tungod sa kuyme diha sa Sityo Buswang sa barangay Cambangog sa siyudad sa Toledo niadtong Domingo sa alas 3:30 sa hapon.
Ang biktima mao si Joseph Dela Conception Sepada, 39, molupyo sa Sityo Panog barangay Magdugo Toledo City, samtang gipangita pa ang suspek nga si Junjun Abadinas, 32-anyos, taga Himatogan Gen. Climaco siyudad sa Toledo.
Matud ni PO1 Jeffrey Caburnay sa Toledo City Police Station dihang nahinabi sa Banat News nga nanari sa tigbakay ang biktima ug iyang maguwang nga si Lucilo nunot sa kapistahan sa maong dapit.
Apan dihang gibuhian na ang mga manok diha sa ruwedahan giingong kalit nga misinta ang suspek o sa kuyme kay gibutang niini ang iyang manok sa apiki.
Tungod niini nahitabo ang panaglalis diha sa tigbakayan ug dihadiha mibunot ang suspek ug wala matinong kalibre sa armas ug gipamusil ang manag-igsuon.
Samtang sa laing pagpamusil diha gihapon sa maong siyudad, patay ang usa ka Anecito Labajo, 39, human kini gipaulanan og bala sa duha ka wa mailhing lalaki nga nagmotor diha sa Curvada Poog, sa syudad sa Toledo alas 6:50 sa gabii sa adlaw nga Domingo.
Base sa imbestigasyon sa Das Police Community Precinct 1 nga gipangunahan nila ni SPO1 Thule Tahadlangit, PO3 Alexander Dimco, PO3 Edmund Liston, ug PO3 Jun Ian Alqueza nasuta nga nag-estambay kilid sa dalan ang biktima kauban ang mga barkada dihang gihunongan sa duha ka lalaking nagmotor.
Dihadiha gipusil sa nag-angkas ang biktima makadaghang higayon hinungdan sa hinanali niining kamatayon. Gisusi pa sa kapolisan kung unsay motibo sa insidente. (Darrel Carumba, Chelsea Quijano, Queenee Anne Vidala /EIM) (BANAT NEWS)