CEBU, Philippines - Patay diha-diha ang usa ka ginang nga usa ka negosyante human aksidenteng maoy naigo sa pagpamusil sa ig-agaw sa iyahang bana nga usa ka konsehal sa Brgy. Bug-ot, Argao sa miaging adlaw alas- 9 sa buntag.
Ang biktima mao si Mirthel Mier Pantinople, 41, samtang ang suspek nailhan usab nga si Isabelo Pantinople, 54, konsehal sa Brgy. Bug-ot nga ig-agaw sa bana sa biktima.
Matud ni PO2 Renato Nacaytuna, desk officer sa Argao Police Station dihang nahinabi sa Banat News nga dili intensyon ni Isabelo nga pusilon si Mirthel tungod kay ang iyang gipunting mao ang usa ka Jayboy Famat.
Si Famat giingong gikaaway sa kinamanghurang anak sa konsehal ug niadtong higayona giingong buot unta kining pusilon sa opisyal samtang diha sa tupad sa bana sa biktima atubangan sa usa ka tindahan.
Ang suspek makaupat ka higayon mipusil kang Famat apan wala niya kini maigo. Si Mirthel kinsa pipila ka metros gikan sa dapit diin mahitabo ang pagpamusil mao hinuoy naigo sa nawong sa ubos nga bahin sa iyang wala nga mata.
Wala dayon mahibaw-ing naigo na diay si Mirthel didto sa unahan ug padayong gigukod sa suspek si Famat hangtud nga kini naigo sa nagkadaiyang parte sa iyang lawas.
Sumala pa ni Nacaytuna dugay nang nagbingkil ang anak sa suspek ug si Famat ug gihangyo na sa maong suspek si Famat nga hunongon ang ilang away tungod kay nahadlok na ang iyang anak magpakita kang Famat.
Apan giingong nagmagahi si Famat kinsa gihulagway ni Nacaytuna nga notado sa maong lugar nga mamareglahay ug gani napusilan na usab kini tulo ka tuig na ang milabay tungod gihapon sa pagpamaregla niini maong gibawsan.
Ang suspek nga opisyal sa barangay gidala sa Argao Police Station ug nakuha gikan sa crime scene ang upat ka kabhang sa caliber .45 nga basiyo sa bala, lima usab ka kabhang sa caliber .9mm ug tulo usab ka deformed slugs. Gidali pagdala si Famat sa Isidro C. Kintanar Memorial Hospital ug gipabalhin sa Vicente Sotto Memorial Medical Center. (BANAT NEWS)