Biyudo nagpusil sa iyang tampihak sud sa lawak

CEBU, Philippines - Patay nang napalgan sud sa kwarto niini ang usa ka biyudo nga gituohang nag-unay pagpusil sa iyang kaugalingon tungod sa wala pa mahibaw-i nga problema didto sa barangayTinaan siyudad sa Naga niadtong Biyernes sa alas 6:05 sa gabii.

Ang nagpakamatay mao si Samuel Macapobre Rivera,72-anyos, byudo ug molupyo sa nahisgutang lugar.

Matud ni PO2 Michael Belarmia sa Naga City Police dihang nahinabi sa Banat News nag- inusara sud sa kwarto si Rivera dihang nahitabo ang giingong paghikog.

Nakadungog pa ang iyang mga kabanay sa usa ka sipang buto sa armas alas 3:00 pasado sa hapon apan wala lang kini panumbalinga apan nianang pagka dayun nang gabii samtang maghatud unta kini og panihapon sa kwarto nakugang na lang sila nga nagbuy-od na kini sa kama nga nagkadugo ang ulo.

Nasayran nga dunay samad pinusilan sa tampihak nga maoy gituohang hinungdan sa iyang kamatayon.

Dugang kasayoran gikan ni SPO3 Remberto Empeynado kinsa usa sa mga miresponde sa alarma nga nakahinabi sa Banat News, duna diay sakit nga diabetes ug umagad na lang niini maoy nag-atiman kaniya tungod kay atoa na tanan sa abroad ang mga anak niini.

Nasuta usab nga bag-ohay pa kining nagpa-opera sa sakit sa mata nga cataract.

Napalgan sa tupad sa patay’ng lawas sa biktima sa mga sakop sa Scene of the Crime Operatives kon SOCO ang usa ka.9mm nga armas ug  usa ka deformed slug, ang armas adunay sud nga duha ka basiyo sa bala ug tulo ka buhing bala.

Ang armas gipaubos pa sa ballistic examination sa kapulisan pagtino kun mao ba gyud kini ang nakapatay sa biktima.

Samtang ang mga kabanay wala masayod kung unsay hinungdan sa paghikog niini apan namatikdan sa mga nangaging mga semana nga kanunay na kining problemado. (Darrel A. Carumba ug Queenie Ann Vidal, CNU Intern/EIM)