Ex-councilor ug ex-police nagpinusilay sa tigbakayan

CEBU, Philippines - Nalandig sa tambalanan ang usa ka kanhi konsehal sa dakbayan sa Talisay human kini giingong napusilan sa igsuon sa kaatbang niya sa tigbakay sa manok kagahapon sa ala 1:30 sa hapon diha sa Friendly Homes Subdivision, barangay Bulacao, dakbayan sa Talisay.

Ang kapolisan miila sa biktima nga mao si Emilio Go, residente sa maong dapit nakabaton og samad pinusilan sa iyang li-og  nga ang bala nalahos sa tangkugo ug laing samad pinusilan sa iyang tiyan ug gidala sa Chong Hua Hospital.

Gawas kang Go, naangol usab si Junrey Larayos, 30, residente usab sa maong lugar ang naigo usab sa pagpamusil ug nakaangkon og samad pinusilan sa tuong bahin sa iyang tiyan ug gidala sa Vicente Sotto Memorial  Medical Center.

Ang suspetsado mao si retired SPO3 Ulysis Desamparado, 53-anyos, silingan sa mga biktima kinsa misurender sa mga polis uban sa iyang armas nga kalibre .45 nga pistola nga may duha ka magazine ug mga bala.

 Ang maong armas ni Ulysis adunay lisensiya ug permit to carry outside of residence (PTCFOR) matud pa sa kapolisan.

Sila si SPO1 Mikies Espina kinsa usa sa mga miresponde sa maong alarma nga nahinabi sa Banat News nagkanayon nga si Go ug Ulysis nagpinusilay tungod sa tigbakay.

Matud ni Espina nga ang nahisgutang subdivision nagsaulog sa ilang kapistahan diin dunay gipahigayong tigbakay.

Sa wala pa mahitabo ang pagpamusil giingong ang manok ni Go ug manok ni Buenafe Desamparado nga manghud sa suspetsado maoy nagkontra sa buwang.

Giingong ang kuyme nga wala pa maila sa kapolisan sa buwangan mideklara nga ang manok ni Buenafe maoy nakadaog kini bisan parehong nangamatay ang duha ka manok.

Usa sa mga miron ug mipusta sa manok ni Go ang misinggit nga tabla ang sultada apan tungod kay nakadeklarar na man ang kuyme nagubot na hinuon ang tigbakay.

Ug tungod kay gideklarar na man sa kuyme nga si Desamparado kuhaon na unta nila ang bihag nga manok ni Go apan giingong wala kini ihatag sa kampo ni Go ang bihag ug wala usab ihatag ang pusta nga P12,600.

Matud ni Espina nga si Go ug Ulysis nag-estoryahanay bahin sa nahitabo apan ang mga sugarol nga nakaabay sa duha maoy nagkainitay og maayo ug nagubot ug miresulta sa pagpinusilay nila ni Go ug Ulysis.

Matud usab ni Espina nga susihon pa nila kung kang kinsang pusil ang nakaigo ni Larayos ug kung wala ba kini apil sa pinusilay.

Na-recover sa mga pulis gikan sa lugar nga nahitaboan ang upat ka mga basiyo sa bala sa kalibre .45 nga pistola usa ka slug ug usa ka buhing bala sa kalibre .45 usab nga pistola duol sa kotse nga giingong gipasalipdan ni Go.

Wa usab masuta kung na-recover ba sa kapolisan ang giingong armas nga gigamit sa kanhi konsehal.

Si Espina midugang nga si Go, Ulysis ug Larayos ipaubos tanan sa paraffin test ug ang na-recover nga bala ipaubos usab sa ballistic examination. Si Ulysis nagtingkagol karon sa Talisay City detention cell mag-atubang og tukmang kaso nga ipasaka batok kaniya.  (BANAT NEWS)