CEBU, Philippines - Mikabat sa P24 mil ang kantidad sa salapi nga nasakiyo sa grupo sa mga mangingilad gikan sa usa ka Japanese national nga gitagbo og usa ka babaye didto sa Ayala Mall sa miaging hapon. Si PO2 Reynaldo Labating sa Theft and Robbery Section sa Cebu City Police Office (CCPO) miila sa biktima nga si Heditoshi Onashi, 25, estudyante sa English Language sa Turtles Mansion, sa Roselio Road , sa sitio Nasipit, barangay Talamban, dakbayan sa Sugbo ug temporaryong nagpuyo sa Valleyfront Hotel sa Brgy. Guadalupe.
Sa imbistigasyon sa kapolisan nasayran nga samtang nagsuroy-suroy ang biktima sulod sa mall, miduol kaniya ang usa ka babaye nga nagpaila nga usa ka Mom.
Nagkasuod sila sa maong higayon ug gidapit dayon sa babaye ang biktima nga mosuroy ngadto sa iyang balay aron tudloan kini sa sugal sa Casino.
Matud ni PO2 Labating nga wala masayud ang biktima sa maong lugar apan naabtan niya sa balay sa biktima ang duha ka lalaki ug duha ka babaye nga nakighigala usab dayon kaniya. Midugang si Labating nga ang maong mga lalaki ug babaye misugod dayon pagtudlo sa biktima paggamit sa baraha, kay usa kuno kadto ka matang sa sugal sa Casino.
Unya tungod kay di man lang igo nga gipraktis siya, gipaubanan man og posta, ug sa tantong pinustahay sa ilang mga kuwarta nahanaw lang daw aso ang P24 mil sa biktima gumikan sa pagkapildi niini.
Matud pa ni Labating nga dihang wa nay kangho ang biktima buot na unta kining mopauli apan gibabagan siya sa duha ka lalaki kay di papaulion.
Hinungdan nga tungod sa kahadlok mihimo siya og drama nga kunohay nalipong siya ug nagpapatay-patay busa dali siyang gihatud sa duha ka lalaki ngadto sa Community Hospital diin didto kini biyai human ika-entrigar ngadto sa taga hospital.
Sumala ni PO2 Labating nga dihang nakalakaw na ang duha ka lalaki nga mihatod kaniya, mitawag dayon ang biktima sa iyang private tutor nga si Grace Pepito ug gipahibawo sa nahitabo kaniya, busa gisumbong usab dayon ni Pepito sa kapolisan.
Sumala ni PO2 Labating nailad ang maong biktima sa usa ka sindikato sa mangingilad ug mao kini ang ilang gipanid-an karon. (BANAT BALITA)