CEBU, Philippines - Patay na nga napalgan ang usa ka ulitawong guwang sulod sa gipuy-an niining balay didto sa Brgy. Sangat, lungsod sa San Fernando sa miaging hapon.
Ang biktima giila nga si Juanillo Tanudtanud, 48, ulitawo, nga nagpuyo sa maong lugar.
Tipon sa balay nga gipuy-an sa biktima mao ang iyang maguwang nga si Bebeth Tanudtanud, 52, nga giingong may deperensya sa pangisip.
Sa pasiunang imbestigasyon sa kapolisan sa San Fernando nga gipangunahan nila ni PO3 Edgar Mantalaba ug PO1 Miguel Bernabe, nasayran nga si Bebeth giingong nanghasi sa gawas sa ilang balay niadtong Miyerkules sa hapon nga miresulta sa pagkasamad ni Marita “Mayet†Tanudtanud, pag-umangkon niini ug sa biktima.
Gumikan niini gisumbong sa mga ginikanan ni Mayet ang nahitabo ngadto kang konsehal Isabelo Diolan sa maong barangay.
Apan pag-abot ni Diolan sa maong lugar pasado alas 11:00 sa gabii sa maong adlaw aron imbistigahon sa Bebeth, napakyas kini pagsulod sa pinuy-anan niini tungod kay sirado ang pultahan ug pawong ang suga .
Niadtong Huwebes pasado alas 4:00 sa hapon , nakit-an na lang ni Alvin Tanudtanud, pag-umangkon ni Bebeth nga naghay-ad na ang patay’ng lawas sa biktima nga walay sapot sulod sa balay.
Wala usa’y nakita ang kapolisan nga samad sa lawas sa biktima o kaha bun-og niini, busa wala nila hisayri unsay hinungdan sa kamatayon niini.
Sa imbistigasyong gihimo sa kapolisan nasuta nga nanuali ug nakuyat-ag ang mga butang sulod sa balay nga gipuy-an sa biktima ug sa maguwang niini nga liso og pangisip, timailhan nga may kalambora nga nahitabo sa sulod sa balay una mamatay ang biktima
Sa pagkakaron, padayon pa nga giimbistigar sa kapolisan ang maong hitabo.
Samtang gipangita usab sa kapolisan si Bebeth, kinsa maoy ilang gidudahan nga may kasayoran sa kamatayon sa biktima. (/WC) (BANAT BALITA)