Stage giilogan , demolisyon gipahunong

CEBU, Philippines - Gipahunong ang demolisyon sa usa ka stage sa Sitio Mahayahay, Barangay Apas, nga giplano nga patukoran sa usa ka building  sa mga opisyales sa Barangay Apas ning siyudad sa Sugbu.

Giluwatan og cease and desist order ang gikatakda nga demolisyon sa usa ka stage gipanag-iya sa MARAI homeowners Association sa Sitio Mahayahay.

Ang maong stage plano nga patukoran og usa ka dos-andanas nga building nga gipundohan sa Barangay Apas aron maoy gamiton isip Day Care Center sa maong lugar.

Nahibaw-an nga ang yuta nga gitarukan sa maong stage gipanag-iya sa probinsya ug dili sa barangay. Ang demolition order giingong gipirmahan ni acting governor Agnes Magpale.

Apan gilimod kini sa usa sa mga legal consultant ni Magpale nga si Atty. Dara Acurzar tungod kay matud pa niya nga walay gipirmahan nga demolition order si Magpale alang sa Sitio Mahayahay.

Si acting mayor Joy Young mibutyag nga  karong nahibaw-an nga di tinuod ang demolition order gikan sa Kapitolyo, gimandoan ni Young ang kapolisan, Prevention Restoration Order and Beautification Enhancement (PROBE), ug sa Barangay Council sa Apas nga di ihinayon ang demolisyon hangtod dili mohatag og kamandoan ang Provincial Government nga maoy nanag-iya sa gikatukuran sa maong stage. (Jessa Celocia CNU /EIM)