Usa ang patay sa rabies ning tuiga dinhi sa Cebu City

CEBU, Philippines - Walay pagsaka sa gidaghanon sa mga kaso sa rabies sa syudad sa Sugbu kun  itandi sa mga kasong natala sa miaging tuig apan dunay usa ka tawo nga namatay karong tuiga.

Si Dr. Alice Utlang, pangulo sa Cebu City Veterinarian nagkanayon nga pareho ra sa niaging tuig ang ilang mga natala nga kaso sa rabies sa unang lima ka buwan sa tuig 2013.

Sa pagkakarun anaay unom ka kaso sa rabies sa dakbayan nga natala gikan sa Enero hangtod ning bulana.

Duha niini naggikan sa Barangay Apas, usa gikan sa Barangay Talamban, usa sa Tisa ug laing usa sa Kinasang-an, puros naggikan sa paak sa iro. Anaa usab laing kaso sa rabies sa Barangay Parian gikan sa paak sa iring.

Dugang pa ni Utlang, aduna sila’y natala nga lima ka tawong napaakan og iro sa managlahing dapit sa dakbayan sayo niining tuiga ug usa niini ang namatay tungod sa rabies.

Nahibaw-an nga ang iro nga nakapaak sa maong tawo wala mabakunahi ug wala nay nag-atiman. Sa laing bahin, mopahigayon ang United States Dog Agility Association (USDAA) ug usa ka patigayon alang sa mga iro, ang “The First Philippine Dog Agility Championships.”

Ang maong kalihokan salmotan sa 64 ka nagkalain-lain nga breed sa mga iro ug tulo niini mga asong pinoy o AsPin.

Mahitabo kini sa Mayo 25 ug 26 sa alas-3 sa hapon diha sa IT Park, Barangay Lahug, syudad sa Sugbu.

Ang duwa nga salmotan sa mga iro mao ang: jumpers competition, gambler’s competition, standard agility, ug ang disc dog competition.

Ang presidente sa USDAA nga si Kenneth Tatsch nagkanayon nga walay kwarta nga ganti alang sa mga mananaug kundi trophy ug ang kadungganan.

Dugang pa niya nga ang maong kompetisyon dili lang alang sa mga iro kundi usa ka “dog-human” event tungod kay usa kini ka bonding activity tali sa iro ug sa iyang amo. (/EIM) (BANAT BALITA)