CEBU, Philippines - Nakugang ang mga magtutudlo ug mga tinun-an atol sa paglusad og Brigada Eskwela sa Mantalongon National High School sa barangay Mantalongon bukirang bahin sa lungsod sa Dalaguete niadtong Martes sa alas 7:00 sa buntag dihang ilang nadiskubrihan nga gilungkab na diay ang ilang tunghaan.
Matud ni SPO3 Gerson Salibio sa Dalaguete Police wala pa masayri kun kanus-a nahitabo ang pagpanglungkab apan nadiskubrehan kini niana pang Martes sa buntag atol sa Brigada Eskwela.
Igo na lang gi-report sa mga magtutudlo ngadto sa kapulisan ang hitabo. Sumala pa sa mga imbestigador nagkatag na ang mga butang diha sa library ug faculty room ug sa gihimong dugang pakisusi nahibaw-an nga gihurot og kawat ang upat ka mga computer units alang sa mga tinun-an diha sa computer room.
Nasuta sa imbestigasyon nga gitangtang ang gitabong table diha sa gibutangan sa aircondition unit ug didto moagi paingon sa sud. Sa paghimo ning balita padayun pa ang imbestigasyon sa kapulisan pag-ila sa mga suspek nga milungkab sa maong tunghaan. (BANAT NEWS)