CEBU, Philippines - Gitakdang makompleto na karong sunod semana ang imbistigasyon sa kadaot sa mga gasang sa ilawom sa dagat sa dakbayan sa Lapulapu nga gidaro sa Yellow Submarine sa miaging mga semana.
Si Ed Llamedo, tigpamaba sa Department of Environment and Natural Resources (DENR)7 mibutyag sa Banat News atol sa tulumanon AGIO Forum kagahapon nga ila pang gisuta ang kantidad sa mga nadaot nga coral reefs kon mga gasang nga nahimutang sa Kontiki wall sa maong dakbayan.
Ang pagkuwenta sa kadaot himoon pinaagi sa pagsukod sa gilapdon sa wanang sa mga nadaot nga gasang ug ang gidugayon na sa ilawom sa dagat niining mga batoha.
Matud pa ni Llamedo nga nalangay ang pagkuwenta sa DENR sa kadaot sa maong mga gasang kay sutaon pa man kun tagpila na ka tuig ang maong mga gasang sa ilawom sa dagat.
Miingon si Llamedo nga duruha ka klase ang gasang, adunay hinay motubo ug may paspas usab motubo.
Matud niya nga ang hinay motubo, moinat lang kini og 01 millimeter matag tuig, samtang ang paspas motubo, moinat usab og 1 ngadto sa 10 millimeter matag tuig.
Ang mga gasang matud pa ni Llamedo importante kaayo kay mao kini ang itloganan sa mga isda.
Di usab kini mamugna sa artificial nga paagi, kay ang pagtubo niini ilawom sa dagat mugna sa kinaiyahan.
Gisugdan sa DENR ang pag-imbistigar sa maong kaso human madawat ang report gikan sa kagamhanan sa dakbayan sa Lapulapu niadtong miaging Abril.
Kini human suspensoha sa lokal nga kagamhanan sa maong dakbayan ang operasyon sa Yellow submarine pinaagi sa giluwat nga cease and desist order niini human masayri nga gigusbat ang mga gasang niini didto sa Kontiki wall. (BANAT NEWS)